Awit Sa Gugma (Victory Band) Song Lyrics

Sa tinuod lang
Gibati ako sa paghigugma Nimo
Tungod sa gipakita nga gugma kanako
Ingon sa dili ako mahimutang kung malayo Kanimo
Busa dili og dili ako mubiya Kanimo, o Ginoo

Koro:
Bisan wala Kita makita apan nakita ko ang gugma Mo
Buhi ka nga Dios nga akong gialagaran
Bisan ako makasasala Imo akong gipakaway sala
Takos Ka sa tanang pagdayeg og pasalamat

Salamat sa grasya og kaluoy mo kanako, o Ginoo
Salamat, gugma Mong walay paglubad
Nga giluwas mo ako sa pagkamakasasala, o Ginoo

Manganta Ta Og Daghan Aron Bibo!

Nagdako ko sulod sa simbahan. Literal. Sulod sa compound sa simbahan. Hehe. Among balay (pastoral house o parsonage) naa sa luyo sa simbahan. Akong dulaanan kay lawn sa simbahan. Akong dampaanan, jaxtonan, litikanan, gidaganan, og giligiran kay ang atubangan og likod sa simbahan og salog mismo sa simbahan. Ang gate nga akong ginasudlan og ginagawasan kay gate sa simbahan. Ang kahoy nga ako gikatkatan kay nagtubo sa yuta sa simbahan. Pag-abot nako og onse anyos nakabalay na og sarili akong amahan para sa amua nga iyang pamilya. Mga pila ka bloke ang among balay gikan sa akong nadak-ang balay (sa sulod sa simbahan) mao halos kada adlaw nagsigehan gihapon kog dula sulod sa compound sa simbahan. Kada adlaw Domingo naa mi sulod sa simbahan. Bibo kay daghan kanta. Mapa-English, mapa-Tagalog, mapa-Ilocano og mapa-Bisaya kay kumpleto. Labi na sa himno na kay Ilocano og Bisaya jud gamit namo sa simbahan. Pero mas nitatak sa akong utok ang mga Bisaya nga kanta, og mao ni sila ako gusto ipaambit kaninyo karong mga higayuna. Ania..

1. 

Ikaw anak sa Dios, ako anak sa Dios

Kitang tanan anak sa Dios.

Ikaw anak sa Dios, ako anak sa Dios

Kitang tanan anak sa Dios.

Sayaw-sayaw og dyutay

Kamot ikaway-kaway

Hawak ikiay-kiay, tuyok gamay.

2.

Dagan sa lumba ning kinabuhi may ganting nagahulat.

Biyai ang tanan nimo nga sala, pagtutok sa daganan.

Mga saksi kanimo nagatan-aw dili ka magkabugnaw.

Dagan sa lumba ning kinabuhi, mananaog kang Hesus!

3.

Ang Dios dako, kusgan og gamhanan, walay butang nga di Niya mahimo.

Ang Dios dako, kusgan og gamhanan, walay butang nga di Niya mahimo.

Ang bukid Iya, ang kapatagan, ang kalibutan Iya.

Ang Dios dako, kusgan og gamhanan, walay butang nga di Niya mahimo.

4.

Gugma nga walay pagkabalhin

Gugma nga walay paglubad

Hataas pa sa kalangitan,

Halapad pa kaysa kadagatan.

5.

Walay sukod ang gugma Mo, dili matugkad

Kanunay nga bag-o, dili mausab

Ang katahom sa presensya Mo kanako galig-on

Balaan Ka, Dios sa tanan, daygon Imong ngalan.

Daygon Ikaw, daygon Ikaw

Balaan Ka, Dios sa tanan, daygon Imong ngalan.

Daygon Ikaw, daygon Ikaw

Balaan Ka, Dios sa tanan, daygon ko Ikaw.

6.

Ibayaw, ipakpak ang imong kamot

Ilukso, isayaw ang imong tiil

Paglukso, pagsinggit, pagmaya og pagdayeg.

Kay si Hesus, duol na mubalik

Hari sa kaharian, labaw Siya sa tanan.

Ibayaw ang Imong mga kamot

Iluhod ang imong mga tuhod

Simbaha, Ginoong manluluwas ta

Kay haduol na ang pagbalik Niya.

7.

Ikaw ang nagbuhat sa kalangitan

Ikaw ang Dios nga nagbuhat sa kalibutan

Ikaw ang Dios nga nagbuhat sa tanang may kinabuhi

Aron nga magadayeg sa Imong ngalan.

Pagasimbahon, pagasimbahon Ka.

Dios nga balaan pagasimbahon Ka.

Dios nga awitan, Dios nga awitan Ka.

Dios nga gamhanan, pagasimbahon Ka.

Pagasimbahon Ka.

Og daghan pa. Post ra nako dinhi sa mga muabutay pang adlaw. Kay sa pagkakaron, nalingaw nako og kanta-kanta.. 

Pagpaila-ila

Maayong adlaw o gabii sa tanang gabasa nga nakasabot apil napud sa mga dili makasabot. Mga mag upat ka tuig napud ang milabay sugod nga nagbuhat kog akong blog gamit ang blogspot, naabot pa man gani ko og wordpress pero dili nako kaayo gama mao sa blogspot ko nilahutay. Wala pud koy ikamaintain og domain kay dili lang ko ganahan. Haha. Post-post lang gud sa bisag unsang nahitabo sa akong kinabuhi, minor-minor lang. Sa mubong pagkastorya, litanya. Kung eninglishon, rants. Char. Hehe.

Bitaw, paila-ila sa ko sa inyuha aron bahalag basa-basa lang mo kay bal-an pud ninyo kinsay gapost ani. Taas kaayo akong ngalan pero tawaga lang ko sa ngalan nga Mahal, o Shama (butangi og pinagahi sa ulahing letra 'a') o Fay. Bisag asa kay payts ra. Bata pa pud ko kay wala paman ko nagtrenta. Hohohoho! Mga kapin tulo pa katuig gikan karong petsaha nga gipost nako ning bahina. Minyo og naay tulo ka anak.

Bisaya ko kay natawo ko sa usa ka gamayng lungsod sa probinsya sa Bukidnon. Akong amahan dayo sa maong lugara gikan sa Compostela Valley pero dayo ra pud gihapon sila sa iyang gidak-ang lugar kay natawo man siya sa Carmen, Bohol, usa diay ka purong Boholano (Bul-anon) akong amahan. Ang akong inahan maoy natawo sa Bukidnon og didto napud siya nidako og didto niya nailhan og nahimamat akong amahan nga sa ulitawo pa naningpalad sa iyang pagkapastor sa Assemblies of God. Ang akong inahan katunga-Igorot (sa bahin sa iyang amahan nga ang mga gituburan gikan sa Baguio, Benguet, Bontoc, Apayao og Kalinga), katunga-Ilocano (sa bahin sa iyang inahan nga gikan og San Emilio, Ilocos Sur). Mao nga ako, mestiza. Char. Hehe. Matod pa sa akong giingon ganina, akong amahan isa ka Pastor hangtud karong mga panahona og akong inahan maestra sa hayskul sa una pero pagpanganak niya nako kay wala na siya mibalik sa iyang propesyon og mas gipili ang bokasyon sa iyang pagkaasawa og pagkainahan sa sulod sa among panimalay. Ako ang kamagulangang anak nila og nag-inusarang babae. Naa koy mga manghud nga duha puros lalaki og mas dagko pa sa akua kron.

Ang akong naminyuang lalaki gianak og nidako sa Tabuk, Kalinga (katunga-Igorot, katunga-Ilocano). Nia ko karon uban ang ako ng kaugalingong pamilya nagapuyo sa laing parte sa isla Mindanao. Kung asa akong bana didto pud ko - all the way! (nakaenglish ang peg). Duol mi sa dagat, sa mga kabukiran og sa mga tamnanan og daghang pinya, saging og papaya. Murag gihapon og Bukidnon. Murag gihapon og Luzon. Gabakasyon mi sa Bukidnon sa akong ginikanan kaduha sulod sa usa ka tuig. Sa Luzon kausa sa usa ka tuig, layo man gud unya kinahanglan dako-dako nga pondo kay dili man sa tanang panahon makauna ta sa promo sa Cebu Pacific. Hehe.

Ngano, nagbuhat ko ani nga blog nga bisaya akong gamit kay mas komportable ko. Dili man sa ingon nga dili ko sa English - mao baya na ato mainstream sa ato communication aside sa Filipino. Og, kabalo man pud ko muenglish kay nakatrabaho man ko sa mga call center sa Davao City sa una, mao ang nakabuhi sa akua og pila ka tuig human skwela ayha naminyo og pasalamat ko sa English. Akong mga anak Bisaya pud kaayo pero og storyahon nimo og English makasabot sila pero tubagon jud ka og Bisaya. Haha. Dili man jud ko hawod sa English, ang akong mga karaang blog sigehan pud nako og post og English pero nangita jud kog paagi nga makaexpress sa Bisaya mao gibuhat nako ni. Hoooray! Hehe. Maayo ng usahay kay naa tay pahungawan sa sinultian nga ato gayud.

Bitaw uy, ganahan lang ko magsige sulat-sulat. Haha. Unya kay uso naman ning kompyuters karong mga taknaa mao post-post na. Haha.